2Pe 2 | APZ | STEP | Hohonta a'amu fehohnjoso hofɨko a'amu Juta somo Anɨtumne'no hwasyo hungkuno lɨmotofofoho. Oso hopaso a'amu fehohnjo hwasyo hungkuno'njoso sekwo'njo ajwo so'mta'ni wolɨkofantɨfeho. Hofɨko sekumo hungkuno ole maselɨfitnnehofo, Nakwo olo hungkuno selalokuhwone loso kengo mta'angofoho. Ose maselɨfitnnehofo. O'o, hofɨko sekumo ole woselantɨfeho. Nakwo olo hungkuno selalokuhwone loso Anɨtuye hungkuno selalokuhwono. Hofɨko sekumo ose hwasyo selɨkuji hofɨko Anɨtuye hungkuno so'nji hofɨkoe huno kengo mta'ango hwasyo so'nji woselantɨfeho. Sekwo hofɨkoe hwasyo hungkuno homo somne'no sɨmeho hi'ntnnono uyɨfijoso oso a'amu hiso sekumo wonyo wosemokantɨfeho. Jisas Kɨlais kako hofɨkoe wonyo somta'ni mpe ko nto ema'mentisoso hofɨko kakimo hohujo apa'no ikinjɨmo'mentohofofoho. Hofɨko hohujo ikinjɨmo'mentohofo so'no hofɨko wonyo komo'no imo'nɨfitnnefoho.

2 Peter 2

A'amu Anɨtuye hungkuno hwasyo lɨwo'nɨngkohofo sohwafe hwasyo yahino wonyo so'ne hungkunofoho.

1 Hohonta a'amu fehohnjoso hofɨko a'amu Juta somo Anɨtumne'no hwasyo hungkuno lɨmotofofoho. Oso hopaso a'amu fehohnjo hwasyo hungkuno'njoso sekwo'njo ajwo so'mta'ni wolɨkofantɨfeho. Hofɨko sekumo hungkuno ole maselɨfitnnehofo, Nakwo olo hungkuno selalokuhwone loso kengo mta'angofoho. Ose maselɨfitnnehofo. O'o, hofɨko sekumo ole woselantɨfeho. Nakwo olo hungkuno selalokuhwone loso Anɨtuye hungkuno selalokuhwono. Hofɨko sekumo ose hwasyo selɨkuji hofɨko Anɨtuye hungkuno so'nji hofɨkoe huno kengo mta'ango hwasyo so'nji woselantɨfeho. Sekwo hofɨkoe hwasyo hungkuno homo somne'no sɨmeho hi'ntnnono uyɨfijoso oso a'amu hiso sekumo wonyo wosemokantɨfeho. Jisas Kɨlais kako hofɨkoe wonyo somta'ni mpe ko nto ema'mentisoso hofɨko kakimo hohujo apa'no ikinjɨmo'mentohofofoho. Hofɨko hohujo ikinjɨmo'mentohofo so'no hofɨko wonyo komo'no imo'nɨfitnnefoho. 2 A'amu pi'nɨngo engoso nakwo Anɨtuye a'amu ne'nwoho lɨkuji hofɨko hofɨkoe yahino kengo kengo wonyo somo unɨngkowantɨfeho. Oso a'amu hofɨko yo'mayo wonyo yontɨfe so'no a'amu nom'neso hofɨko nuhwonɨngkuji Anɨtuye a'amu nefoho syafɨsyɨkuji hofɨko Anɨtu kakoe hungkuno ne'njo somne'no sitofo woselantɨfeho. 3 Oso a'amu hwasyo hungkuno'njo hiso hofɨko sekwoe hamniyoho so'no hi umo'nɨngkuhwoso'no hofɨko sekwoe yo'mayo hamniyoho wosemano lɨkuji sekumo hungkuno kengo kengo hwasyo woselantɨfeho. Oso'no hohonta Anɨtu kako oso a'amu hiso hofɨko Anɨtu'nji hungkuno ikwolofɨkuji wonyo imo'nyo'ne sɨkuno ho'nahumentisoso weho. Oso'no Anɨtu kako tɨmo mopeku'nohumuyoho. O'o, kako tɨmo hontohumaho.

4 A'amu ahwomomjo fehohnjo wonyo imentohofo sohwamo Anɨtu kako hofɨkimo tɨmo'nohini uhwonɨmentiso'maho. O'o, kako hofɨkimo tɨkanomo uhumatɨ'mentiso sohwa hofɨko osopo sɨkwo'mjoho nɨhu'no wonyo so'mo humantɨfi oso sɨkuno Anɨtu'nji hofɨko hungkuno ikwolofo'ne so'no hontohumalofo 5 Hohonta hwe moya'mi hofɨko Nɨwa'nji humamentohofo somo Nɨwa kako yahino wopɨngo so'no hungkuno yoloho ko lutɨhwahonɨngki hofɨko Anɨtumne'no hohujo ikinjɨmo'mentohofo so'no Anɨtu kako mijo ayo engo somo hungkuno ulahonɨngki oso mijo ayo engo huhwo sohwo hofɨkimo ifehu'mokosyahonɨngki oso a'amu hiso hofɨko mijo meepolo'mentisofoho. Oso hohosohonta Nɨwa kako hwe wopɨngo'nohino sohwo'nji kakoe a'amu aho fehohnjo hopi'nonohini nom'ne mta'ni hufa'u oso a'amu hofɨko yofayokinomo songo humamentohofofoho. 6 Oso a'amu ango pone hufa'u Soutom'nji Ngkoumoulajo humamotofoso hofɨkoe honɨngkano wonyo somne'no ahwomo mta'ni Anɨtu kako oso ango hopo sopo tɨposyo ho'nao'mentisoso hwakufo nimo'nɨmentisofoho. Oseso olohonta a'amu hofɨko Anɨtumne'no hohujo ikinjaofɨwo'nɨngkohofoso hofɨko oso ango hufa'u somne'no tohino mayoso'no huno uyɨhwoso'no hofɨko Anɨtu'nji hungkuno ikwolofo so'ne sɨkuno somne'no iyoho unono. 7 Oso ango hufa'u soponta'ango fihumo Anɨtu kako songo humayo'ne utɨma'mentisoso anga'nohino hweho. Kakoe yofeso Loutɨyoho. 8 Oso hwe wopɨngo Lout huhwo sohwo kako a'amu wonyofe yahino wonyo somne'no kakoe sɨmeho tango engo uyɨmentisofoho. 9 Oseso nakwo huno wonayono. Anɨtu kako a'amu kakoe yahinomo tɨfi inɨngkawowo'nɨngkohofo somo yo'mayo tango u'mayo so'no ufo'mawo'nɨngkiso hweho. Oso'nji Anɨtu kako a'amu honɨngkano wonyo'njo somo hungkuno ikwolofoso sohonta tohino nuyonefoho. Huno ose wonayono. 10 A'amu fehohnjo hofɨko Anɨtuye hungkuno so'no ne anefoho syafɨsyɨkuji Anɨtumne'no hohujo ikinjaofɨkuji nakwo Anɨtumo enjwa'mo humayoso nakwolaho lɨkuji yo'mayo wonyo hofɨkoe sɨmeho umo'nyo somo inɨngkafijosomo a'amu homo somo Anɨtu kako tohino engo uyonefoho. Hofɨkoe tohinoso nom'ne somo yakolo'nnyofoho. Oso a'amu Anɨtuye hungkuno hwasyo lɨwo'nɨngkohofoso hofɨko yokumpohn'nyo imo'nontɨfi hofɨkoe hunomnohini inɨngkawowo'nɨngkohofofoho. Oso'no hofɨko a'amu ahwomomjo somne'no sitofo ujoso'no iyoho munyofoho. 11 I oseso oso a'amu hwasyo hungkuno'njo somne'no a'amu ahwomomjoso hofɨkoe yokumpohn'nyo'nji yofe engo'nji yakolo'nnyo ko huhwa hofɨko oso a'amu hwasyo hungkuno'njo huhwo sohwamne'no Anɨtumo sitofo mujo'ne hwafoho.

12 Oso a'amu hwasyo hungkuno'njo wonyoso hofɨko yo'mayo wonyo hofɨkoe sɨmeho umo'nyo somo iwo'nɨngkohofofoho. Hofɨko yahwohuno'njo hwafoho. Yo'mayo so'no hofɨko huno nto'no mosyafɨsiyo'njo ifijoso hofɨko oso hiso'no sitofo wolantɨfeho. Yahu kona'wohi mu meesyososo a'amu fonjasyontɨfe pa'nyoso oso a'amu homo somo Anɨtu kako ose imokonefoho. 13 Hofɨko nom'ne a'amu somo tango engo uyɨwo'nɨngkohofo so'no hofɨko tango engo womantɨfeho. Hofɨko wonɨmango munyo'njo yo'mayo wonyo hofɨkoe sɨmeho umo'nyoso utɨhwa'nyopo iwo'nɨngkohofofoho. Ose yontɨfi hofɨko sɨmonyo iwo'nɨngkohofofoho. Ole selɨwo'nɨngkohofi, Nakwo ho'nwi Anɨtuye a'amu ne'nwoho selontɨfi sekwo Anɨtumne'no uhu'mokuwo'nɨngkohofo sohonta a'amu hiso'nji sekwo ifohutn'nyo sopo swo'nontɨfi oso a'amuso hofɨkoe yahino wonyoso hwapɨfe halojo sopo kiho lopisyaofisyo pa'nyo'njo hwafoho. 14 Hofɨkoe yahinoso olenoho. Hofɨko ape hwa'ntesimo uhwonano lɨwo'nɨngkohofofoho. Hofɨkoe honɨngkano wonyo somne'no inɨngkayo'ne mijoho uyɨwo'nɨngkisofoho. Oso hiso hofɨkoe sɨmeho somo sɨmeho muhnnɨwo'nɨngkisofoho. Oso a'amu hiso hofɨko a'amu nom'ne Anɨtuye hungkunomo aho yokumpohn'nyo nto'no mokemokosyohumawo'nɨngkoho yohofo somo afofo hungkuno ulontɨfi hwasyo honɨngkanomo inɨngkayo'ne ipemotawowo'nɨngkohofofoho. Hofɨko nom'ne a'amufe yo'mayo so'no hi umo'nɨwo'nɨngkisofoho. Oso a'amu homo somo Anɨtu kako wae yaofonefoho. 15 Hofɨko honɨngkano nto'nohino somo hohujo ikinjaofontɨfi hofɨko olopole nonje nonje ilohofomɨwo'nɨngkohofofoho. Hofɨko oso hwe hohontajo Mpeyouye hwomu Mpelam sohwo kako hamniyoho engo mayo'ne yahino wonyo imentiso oso pa'nyofoho. 16 Yahutoungkiso a'mohungkunoso malɨwo'nɨngkoho yohoho. I oso'no Mpelamɨye yahutoungki fihwo kako Mpelamɨye honɨngkano wonyo somne'no wopɨjwahumonto oso yahu huhwo sohumo Anɨtu a'mohungkuno kakoe hunomo ho'nɨsyahonɨngki oso yahu sohwo kako Mpelammo yoka ulɨmentisofoho. Oso'no yahu huhwo sohwo kako a'mohungkuno'nji Mpelamɨye yahino wonyo somo pɨjwahumentisofoho.

17 Oso a'amu Anɨtuye hungkuno hwasyo lutɨhwawo'nɨngkohofoso hofɨko mijɨlɨmno somo jefo yonto sa'nɨwo'nɨngkiso pa'nyofoho. Oso a'amu hwasyo hungkuno'njoso hofɨko oso humeengo engo saponte somo ifofo yokumpohn'nyo engoso ponto mtɨhupo'meefɨwo'nɨngkiso pa'nyofoho. Oso a'amu hisomne'no Anɨtu kako hofɨko ango nɨhu'no sɨkwo'mjoho so'mo humafitnne'ento sokafo esyohumaho. 18 Oso a'amu hiso hofɨko hofɨkoe yo'mayo wonyo iwo'nɨngkohofo somne'no hofɨko hofɨkoe yofe ho'noma'nɨwo'nɨngkohofofoho. Hofɨko nɨhu'no huno anefoho. Hofɨko nom'ne a'amu wonyo honɨngkanomo kahopi ho'nosyalokwofo oso a'amu somo hofɨko afofo hungkuno ulontɨfi hofɨko oso a'amu homo somo honɨngkano wonyo somo ne'no apa'no asomo ipemotowalokwofo. Ole lutɨhwawo'nɨngkohofi, Yo'mayo wonyoso jɨje sɨmeho kumo'nɨngkiso somo noho fiyo. Ose ulahonɨngkofi a'amu hiso hofɨkimo tɨfi inɨngkowalokwofo. 19 Oso a'amu hwasyo hungkuno'njoso hofɨko ole lutɨhwawo'nɨngkohofi, Yo'mayo wonyoso sekwo sekwoe sɨmeho semo'noso'manji u sekwoe syohofoho. Sekwo honɨngkano hungkuno somo enjwa'mo humayoso peho'neto. Sekwo yahinoso nom'ne a'amu semokosyohumunyo ku'maho. O'o, sekwo kongkaku mokosyohumunyo kuyoho. Ose ko ulahonɨngkofi hofɨkoe yahino wonyo so'nji hwasyo hungkuno so'nji hofɨkimo aho yokumpohn'nyo kemokosyohumunyofoho. Hofɨko yahino wonyofe syoho ulohofiyofoho. 20 A'amu fiso hofɨko Jisas Kɨlais kako hofɨkoe wonyomne'no poyo imo'nɨmentiso so'no hofɨko oso hungkunoso mupa'nɨmmentohofoso hofɨko wonyo we'e humalofo. I oso'no a'amu fiso hofɨko hofɨkoe wonyo honɨngkano somo hohujo ikinjaofɨkuji osopo hofɨko honɨngkano wonyoso nto ho'naopijoso apa'no nomafɨkuji aho yokumpohn'nyo kemokosyohumafijo'manji oso hohosohonta hofɨkoe fosyohumayo somo Anɨtu kako hofɨkimo nɨhu'no wonyo fosyohumentanɨngkuji uhwonɨmontonoho. 21 Oso a'amu hiso hofɨko honɨngkano wonyo nɨhu'nahone nto ho'nao'mentohofoso apa'no ma'mentohofoso hofɨkimo Anɨtu kakoe hungkunoso hofɨkimo mu'maso'njo yontentesi hofɨko wopɨngo humafɨkutnnesohilo. I oso'no hofɨko Anɨtuye honɨngkano wopɨngo somne'no huno wopɨngo tɨpema'mentohofo homo somo hofɨko aku hohujo ikinjao'mentohofo so'no hofɨko tohino mɨkunɨmposo engo womantɨfeho. 22 A'amu Anɨtuye hungkunomo upa'nontɨfi hungkuno homo somo hwotoho hmmentohofoso hofɨkimne'no oso hungkuno oso sɨwojo yahu yahino'njofoho. Oseso nehopi lɨwo'nɨngkohofo. Sɨwojo kakoe yahinoso hwolaho mjasyɨhwosi apa'no womanɨmontonoho. Yahu sohwa mno nto ijontɨfe somo apa'no wentɨfi ijɨwo'nɨngkafo pa'nyofoho. Oso a'amuso hofɨko Anɨtuye honɨngkanomo tɨfi we'enehwo inɨngkawentɨfi osopo hofɨko Anɨtumne'no hohujo ikinjaofɨwo'nɨngkohofoso hofɨko sɨwojo yahu osohwafe yahino'njofoho.